Jantokia

Eguzkibegi ikastolan jantokiaren funtzioa haurrei jaten ematea baino askoz gehiago da, eta bertan ematen duten denbora ondo jateko ez ezik, ondo pasatzeko eta ikasteko baliatzen ditugu. Sukalde ingurua heziketarako gunea ere badelako.

Zeregin horren garrantziaz jakitun, jantoki zerbitzua bermatzen duen taldearen lana ezinbestekoa da, eta horregatik, begirale guztiak hezitzaileak dira. Gainera, aldian-aldian formazio berezia jasotzen dute: covid, elikadura-segurtasuna, emozioak lantzeko formazioa, lan arriskuen prebentzioa, sukaldaritza, etab. Alderdi askotako prestakuntza.

Jantokian eskaintzen diren otorduak bertako sukaldean prestatzen dira, bertako produktuekin: KM0 elikagaiak, elikagai ekologikoak, lurreko arrautzak eta arrain freskoa, alegia, eta premia bereziak dituztenentzat ere menu bereziak prestatzen dira. Menuak hiru hilabetero berritzen dira eta bereziki zaintzen dugu jakien elaborazioa ere: labean, olio gutxirekin, plantzan, etab. Gure haurrek, gainera, egunero dute fruta jateko aukera.

Guretzat oso garrantzitsua da elikadura osasungarria, eta bereziki arduratzen gara gure haurrak ere garrantzi horretaz jabe daitezen. Horregatik, otordu osteko tarte libreetan zenbait jarduera eta irteera antolatzen ditugu, eta horietan elkartasuna eta jasangarritasuna lantzeaz gain, jakien eta naturarekin lotutako une aktibo eta dibertigarrian eskaintzen zaie haurrei.